La liga. BBC triosining gollari «Real»ning g'alabasini ta'minladi

Madridning "Real" klubi hozirda yuqori formaga kirib olganini isbotlashda davom etmoqda.

Madridning "Real" klubi hozirda yuqori formaga kirib olganini isbotlashda davom etmoqda. "Qirollik klubi" La liganing 25-turi doirasida o'z maydonida "Alaves"ni qabul qilib, yirik hisobda g'alaba qozondi.

Birinchi bo'limda jamoalar nisbatan ochiq o'yin namoyish qilishdi. "Qaymoqranglilar"ning imkoniyatlarga ega bo'lgani tabiiy holat, ammo, kutilmaganda, mehmonlar ham tanaffusga qadar ko'pgina vaziyatlarni yuzaga keltirishdi. Biroq ulardan foydalanishda "Alaves" futbolchilariga mahorat etishmadi.

Taym tugashiga arafasida Benzema raqib jarima maydonchasi ichida to'pni egalladi va tovoni bilan o'z ortida turgan Ronalduga etkazdi. Krishtianu chap oyoqda aniq zarba bilan darvoza burchagini ishg'ol qildi.

Ikkinchi bo'limning starti madridliklar uchun omadli keldi. Benzema maydon markazida to'pni mehmon futbolchisidan olib qo'ydi va qarshi hujumga asos soldi. Uning uzatmasidan keyin Beyl jarima maydonchasiga kirib borib, yaqin burchakka to'pni joyladi.

Bahsning 61-daqiqasida Vaskesning uzatmasidan keyin Ronaldu jamoasining uchinchi golini urishga muvaffaq bo'ldi. O'yin so'ngida esa mezbonlar penalti ishlashdi. Kutilmaganda, Krishtianu 11 metrli jarima zarbasi tepish huquqini Benzemaga berdi. Uchrashuv davomida ko'p vaziyatlardan foydalana olmagan Karim, bu safar raqib darvozasini zabt etishga muvaffaq bo'ldi.

Ushbu g'alabadan keyin "Real" o'z ochkolarini 51taga etkazib oldi.

Ispaniya La ligasi, 25-tur
Real Madrid – Alaves 4:0 (1:0, 3:0)
Gollar: 1:0 – 44 Ronaldu, 2:0 – 46 Beyl, 3:0 – 61 Ronaldu, 4:0 – 89, penalti Benzema.
Real Madrid – Navas, Nacho, Teo, Karvaxal, Varan, Vaskes, Kazemiro (Lorente, 80), Kovachich (Sebalos, 73), Beyl, Benzema, Ronaldu.
Alaves – Pacheko, Laguardia, Duarte, Ruano, Eli, Torres, Manu Garsiya (Medran, 63), Pedrasa (Ibai Gomes, 62), Peres, Gvidetti (Burgi, 74), Sobrino.
Ogohlantirishlar: Peres (5), Sobrino (20), Lorente (82).