La liga. «Real»ning «ketmoni uchmayapti»

Madridning "Real" klubidan ushbu mavsumda omad qochgan ko'rinadi.

Yuklab olish

Madridning "Real" klubidan ushbu mavsumda omad qochgan ko'rinadi. Zidan shogirdlari "Santyago Bernabeu" yana nafaqat ochko yo'qotdi, balki alamli tarzda mag'lubiyatga uchradi.

La liganing 19-turi doirasida madridliklar o'z uyida "Vilyarreal"ni qabul qilishdi. Birinchi bo'limda mezbonlar kamida ikkita 100 foizli imkoniyatga ega bo'lishdi. Ammo mehmonlar posboni Asenxo aqlbovar qilmas seyv namoyish qilib, darvoza daxlsizligini saqladi.

Ikkinchi bo'limda "sariq suvosti kemasi" nisbatan ishonchli himoyalandi. Bahs tugashiga 2 daqiqa qolganida "Qirollik klubi" burchak to'pini o'yinga kiritdi. Ammo to'pni egallagan "Vilyarreal" tezkor hujumga o'tdi va vaziyatni gol bilan yakunladi. Keylor Navas yakkama-yakka vaziyatda raqib hujumchisining zarbasini qaytargan bo'lsa, Fornals "parashyut" zarba bilan darvozani zabt etdi.

Shu tariqa, "Real" chempionatdagi to'rtinchi mag'lubiyatini o'z hisobiga yozib qo'ydi. "Vilyarreal" esa o'z ochkolarini 31taga etkazib, "Madrid" bilan farqni 1 ochkogacha qisqartirdi.

La liga, 19-tur
Real Madrid – Vilyarreal 0:1 (0:0, 0:1)
Gol: 0:1 – 87 Fornals.
Real Madrid – Navas, Varan, Marselo, Karvaxal, Nacho, Isko (Vaskes, 70), Kazemiro, Modrich, Kroos, Beyl (Asensio, 70), Ronaldu.
Vilyarreal – Asenxo, Alvaro Gonsales, Kosta, Mario Gaspar, Bonera, Fornals, Rodri Ernandes, Trigeros, Kastilexo (Rukavina, 83), Raba (Cheriishev, 46), Bakka (Unal, 76).
Ogohlantirishlar: Bakka (44), Karvaxal (58), Vaskes (89).