«Real» «Barselona» himoyachisini olib qo'yishi mumkin

"Real" barchani shokka tushiradigan transferni amalga oshirishi mumkin.

"Real" barchani shokka tushiradigan transferni amalga oshirishi mumkin. "Barselona" himoyachisi Samyuel Umtiti madridliklar safiga o'tishi mumkin, deya xabar tarqatdi Diario Gol.

"Qirollik klubi" prezidenti Florentino Peres markaziy himoyachi xarid qilishni istamoqda. Ammo "Liverpul" Virjil van Deykni rekord miqdordagi pulga sotib olgani Peresni xavotirga solib qo'ydi. Eslatib o'tamiz, mersisaydliklar "Sautgempton" futbolchisi uchun 85 mln evro to'lashdi.

Manbaga ko'ra, Umtitining "Barselona" bilan tuzilgan shartnomasida tovon puli sifatida 60 million evro belgilab qo'yilgan. "Real" bu mablag'ni to'lab, raqibning asosiy tarkib futbolchisini o'z safiga olib kelmoqchi. Shuningdek, Umtitiga "Manchester Siti" va "Manchester Yunayted" klublari tomonidan ham qiziqishlar bo'lmoqda. "Barsa" esa o'z futbolchisini azaliy raqib safiga osonlik bilan qo'yib yubormasligi tayin.

Samyuel Umtiti ushbu mavsumda "Barselona" safida barcha musobaqalar doirasida 19ta o'yinda maydonga tushdi. Hozirda himoyachi jarohatini davolash bilan band.