Evropa top chempionatlarida holat qanday? Hali birorta ligada intriga o'lmagan

Evropada top chempionatlar qiziqarli pallasiga allaqachon etib keldi.

Yuklab olish

Evropada top chempionatlar qiziqarli pallasiga allaqachon etib keldi. Kecha barcha ichki musobaqalarning tur uchrashuvlari deyarli yakuniga etdi. Ba'zi ligalarning g'olibi bo'lish uchun favoritlar ajrali bchiqishga ulgurdi. Yana bir-nechtasida esa chempionlik uchun kurash avjiga chiqmoqda. Quyida Evropaning top ligalaridagi vaziyat haqida so'z yuritamiz.

A Seriya - "Napoli" so'zsiz etakchi

Italiya ichki chempionatida "Yuventus" jarimaga tortilgach, "Napoli"ning chempionligi deyarli aniq bo'lib ulgurdi. Neapolliklar bundan buyog'iga bunaqa ajoyib o'yini bilan 1-o'rinni boy berishiga ko'pchilik ishonmasa kerak. Luchano Spaletti shogirdlari A Seriyaning 23-turidan so'ng, 62 ochko jamg'arib peshqadamlik qilmoqda. Ularning eng yaqin ta'qibchisi "Inter" hisoblanib, "neradzurrilar"da 47 ochko bor. qolgan 15 tur ichida "Napoli" 15 ochkolik farq bilan chempion bo'la olmasligi uchun klubda katt inqiroz bo'lishi kerak. Ammo chempionat bu bilan o'z intrigasini yo'qotmaydi. 2-o'rin uchun jiddiy kurash bo'lishi kutilmoqda. Chempionni ta'qib qilayotgan "Inter" va 6-pog'onadagi "Atalanta" orasida 6 ochkolik farq bor. Shuningdek, "Roma" va "Milan" Indzagi boshchiligidagi "Inter"dan 3 ochko ortda qolmoqda. Shunday ekan, nafaqat 2-o'rin, balki kuchli 4lik uchun ham kurash kechishi tayin. Bu jamoalar orasida Chempionlar ligasida ishtirok etishni sog'inganlar ham topiladi. Ular qatoridagi "Latsio" 42 ochko bilan 5-o'ringa joylashgan.

Liga 1 - "PSJ"dan oltin medalni tortib oladigan "mard" topiladimi?

Frantsiya oliy divizionida kutilganidek "PSJ" etakchilik qilmoqda. Parijliklar 2 turda 57 ochko jamg'arib, peshqadamlikni hech kimga bermay kelyapti. Jamoaning asosiy raqibi va ta'qibchisi "Olimpik Marsel" hisobida 52 ochko bor. Keyingi turda ikki peshqadam to'qnash keladi va bu o'yin natijasi ko'p narsani hal qilishi mumkin. Agar "PSJ"ning qo'li baland kelsa, poytaxtliklar raqiblaridan ancha o'zib ketadi. "Marsel" g'alaba qozonsa, bizga yana bir intrigani taqdim etadi. 3-o'rindagi "Monako"da 50 ochko bor va ular ham kamida 2-o'rin uchun kurashishi mumkin. Tarkib jihatidan ancha sodda ko'ringan "Lens" 4-o'rinni egallab turibdi va ular 24 turda 49 ochko jamg'argan. Lois Openda etakchiligidagi "Lens" ham medallar uchun kurashishga imkoniyati bor.

Ispaniya - "Real" qarab turmaydi

Ispaniya La ligasidagi intriga unchalik yuqori emas. "Barselona" 22 turda 59 ochko jamg'arib, Ligada g'olib bo'lishga yaqinroq. Ularning asosiy raqibi va tahqibchisi "Real" hisobida esa 51 ochko bor. Bir qaraganda, 8 ochko katta farq emasdek ko'rinadi. Ammo Xavi va "Barselona" ajoyib formaga tushib olgan va ular darvozasiga ligadagi jamoalarning yo'l topishi ham qiyin bo'lib qolmoqda. "Real" esa o'tgan mavsumdagidek barqaror ko'rinmayapti. Anchelottining sevimli oylari endi yaqinlashayotganini hisobga olsak, "Real" hali beri taslim bo'lmasa kerak. Ulardan 2-o'rinni tortib oladigan jamoa ham topilmasa kerak. 3-pog'onadagi "Real Sosedad" hisobida 43 ochko bor. "Atletiko" esa 41 ochko bilan medallar uchun kurashmoqda. "Betis" va "Rayo Valekano" esa kuchli to'rtlikka kirishga intilib ko'radi. Garchi bu ish oson bo'lmasada.

Bundesliga - intriganing "doda"si Germaniyada

Bundesligada noodatiy xolat! Odatda nemislar hammadan oldin chempion nomini aniqlashtirib olardi. Va bu katta ehtimol "Bavariya" bo'lib chiqardi. Ammo bu mavsum myunxenliklarga oson bo'lmayapti. Ular 21 turda 43 ochko jamg'argan va bu peshqadamlik uchun kamlik qilmoqda. Shuningdek, "Borussiya D" va "Union Berlin" ham "Bavariya" bilan birdek ochko jamg'arishgan. Bu hali hammasi emas: "Freyburg" 40, "RB Leypsig" 39 va "Ayntraxt Frankfurt" esa 38 ochko bilan kuchli uchlikni ta'qib qilib kelmoqda. Ushbu chempionatdagi har bir o'rin uchun etarlicha intrigaga xavas qilsa bo'ladi. Odatda qiziqarli tuyulmaydigan Bundesliganing ushbu mavsumi barcha ichki ligalardan ham qiziqarli bo'lishi mumkin. Buning uchun jamoalar "Bavariya"ni endi oldinga o'tkazib yubormasligi kerak. Sensatsiya qayd etilsa ajablanmaymiz.

Premer-Liga - Hali hammasi chalkashib ketishi mumkin

Bundesligadagi intirga haqida aytdim. Ammo bu kurash Anliyadagi kabi bo'lishiga ko'zim etmaydi. Chunki inglizlarning ligasi boshqacha jozibaga ega. "Arsenal" peshqadam va ularda 23 o'yindan so'ng 54 ochko bor. "To'pchilar"dan bir o'yin ko'p o'tkazgan "Manchester Siti" hisobida esa 52 ochko. Ularni taqib qilayotgan va chempionlik uchun kurashga kirayotgan "Manchester Yunayted" esa 24 turda 49 ochko jamg'argan. Ushbu uchlik orasida eng ishonchli o'yinni mankunianliklar ko'rsatishmoqda va shu sabab ham ularni chempionlik uchun kurasha olishi mumkin. 4-o'rindagi "Tottenxem" esa 24 o'yindan so'ng 42 ochkoga ega. Ulardan bitta kam o'yin o'tkazgan "Nyukasl" ChL yo'llanmasi uchun kurashda ustun kelishi mumkin. Ammo Mavsum davomida omadsiz ko'ringan "Liverpul"ning zahirada 2 o'yini bor va ulardan Klopp shogirdlari maksimal 6 ochko to'plasa "Tottenxem"ga etib olishiga 1 ochko qoladi. Bunga esa "Fulxem" "Brayton" va "Brentford" shunchaki qarab turishmasa kerak. Negaki ular ham "Liverpul"dan kam ochko jamg'armagan. "Chelsi" esa biroz ortda qolmoqda. Todd Boelining ishlatgan pullari o'zini oqlasa, balki "aristokratlar" ham kuchli 4likka kirishga urinib ko'rar, ammo bu oson bo'lmaydi.

Mirjalol Pardaboev tayyorladi