Bir paytlar «Real» tarkibiga sig'magan Xoselu bugun «qizil furiya»ning bir bo'lagiga aylanishga harakat qilmoqda

U qarilikni tan olmoqchi emas.

Yuklab olish

Ispaniya futboli muxlislari uzoq vaqtdan beri hujumchilar o'rtasidagi qarama-qarshilikka o'rganib qolishgan. Yaqingacha bu Krishtianu Ronaldu va Lionel Messi o'rtasida kechdi, endi esa Karim Benzema va Robert Levandovski bilan kechayotgan markaziy hujumchi pozitsiyasini avvalgi davrlar bilan taqqoslab bo'lmaydi. Ammo hozirgi asosiy qahramonlarning yo'liga yana bir iste'dod qo'shilgan. Gap «Espanol»ning kamtarona hujumchisi Xoselu haqida ketmoqda. Bu jamoa so'nggi yillarda ichki ligada faqat omon qolishga umid qilmoqda va hatto bir marta Segundaga tushib ketgan. Endi esa vaziyat o'sha-o'sha: Kataloniya klubi quyi ligaga tushib ketish zonasidan atigi uch ochko oldinda. Lekin bu natija ham Xoseluning gollari bo'lmaganida amalga oshishi mumkin emas edi. Xoselu ikkinchi qavatda kuchli (bo'yi 192 sm) va shu bilan birga uzoqdan zarba berishni yaxshi ko'radi va uning ushbu mavsumdagi statistikasi haqida batafsilroq gaplashamiz.

Xoselu 10 ta gol bilan La Liga to'purarlari ro'yxatida ikkinchi o'rinni egallab turibdi. Faqat Levandovski (13) undan yaxshiroq ko'rsatkichga ega. 10 ta goldan 3 tasini Xoselu penaltidan kiritdi. Bu borada u Karim bilan bir xil natijaga ega. Xoseluga har bir golini urish uchun 162 daqiqa vaqt kerak bo'ladi. Bu Levandovski (89) va Benzemaga ketgan muddatdan (100) ko'proq, lekin boshqa yulduzlar - Antuan Grizmann (180), Vinisius Junior (248) va hattoki taniqli to'purar Yago Aspasdan (185) yaxshiroq degani. Albatta, Xoselu bu straykerlarga qaraganda doimiy ravishda maydonda ko'proq vaqt o'tkazdi. Ispaniyalik hozir 32 yoshda (martda u 33 yoshga to'ladi), lekin umuman jarohat olmaydi va o'yinlarni sababsiz o'tkazib yubormaydi. 18 uchrashuv, hammasi asosiy tarkibdan va almashtirishlarsiz amalga oshgan. Ayniqsa, bu yoshda, statistik ma'lumotlarga ko'ra, Xoselu faoliyatidagi eng yaxshi mavsumni o'tkazayotgani ham qiziq. Ispaniyalik futbolchi hech qachon top hujumchi bo'lmagan, biroq bir necha bor 10+ gol urib kelgan (2019/2020 va 2020/2021 yilgi mavsumlarda 11 tadan gol, shuningdek, oxirgi mavsumda 14 ta gol). Xoselu uchun faoliyatidagi eng kuchlisiga aylangan 2021/2022 yilgi mavsumda har bir golga 223 daqiqa kerak bo'ldi. Ya'ni, hozirgidek dinamika bilan futbolchi hayotidagi eng yaxshi mavsumni ham o'tkazishi mumkin. Agar siz Xoselu o'z jamoasi kabi autsayderlar bilan bahslarda sermahsul ko'rinadi desangiz, adashasiz. U penaltidan «Barsa»ga gol urdi, o'yindan esa «Real» darvozasini ishg'ol etdi. Xoselu uchun chiroyli gollar begona emas.

Jumladan, u «Xetafe» darvozabonini chiroyli tarzda dog'da qoldirdi. Xoselu «Real Madrid»ning afsonaviy xaridi edi, ammo buni hech kim eslamaydi. 2009 yilning yozida «Real» prezidentligiga endigina qaytgan Florentino Peres yangi «galaktikos» bilan katta missiyani takrorlashga harakat qildi. Madridga o'shanda 260 million evrolik yulduzlar to'plangan edi: Krishtianu Ronaldu, Kaka, Benzema, Xabi Alonso va boshqalar. Ro'yxatda yana kim borligini bilasizmi? Xoselu! «Selta»ning 19 yoshli futbolchisi uchun Peres 1,5 million evro berdi va o'yin amaliyotiga ega bo'lishi uchun uni darhol klubiga qaytarib yubordi. Hujumchi keyinchalik «Real Madrid»ning ikkinchi jamoasida o'ynadi va 2011 yilda u nihoyat birinchi jamoada debyut qildi (hatto gol urdi), lekin u hech qachon superklubda o'z o'rnini topa olmadi. Xoselu «Real»ni 2012 yilda Germaniyaga qaytganidan so'ng to'liq tark etgan. Ha, u ilk vataniga qaytib keldi - ispaniyalik «Shtutgart»da tug'ilgan va hatto oilasi Galisiyaga ketgunga qadar Germaniyadagi maktabda to'rt yil o'qigan. Kelajakda Xoselu Germaniya («Xoffenxaym», «Gannover») va Angliyada («Stok Siti», «Nyukasl Yunayted») klublarni almashtirib yurdi. 2019 yilda esa u faoliyatidagi eng sermahsul futbolni ko'rsatgan «Alaves»ga joylashdi: uch mavsumda u 113 ta o'yinda 36 ta gol urdi. Ehtimol, bunday hujumchi uchun munosib pul to'lash kerak edi. O'tgan yozda Xoselu «Espanol»ga tekinga, erkin agent sifatida o'tgandi. Hozir esa u shunday o'ynamoqdaki, jurnalistlar uni Ispaniya terma jamoasiga chaqirishni maslahat berishdi. «Luis de la Fuente, mana sizga top hujumchi. U yirtqichlarga monand rejimini yoqdi, deb yozdi AS — «U Qatardagi jahon chempionatidagi umidsizlikdan keyin muxlislar so'ragan markaziy hujumchilardan biri. Endi jamoaga yangi murabbiy tayinlandi. Keling, uning qanday imkoniyatlari borligini ko'rib chiqaylik". Xoselu 32 yoshida hech qachon Ispaniya terma jamoasiga chaqirilmagan - faqat yoshlar jamoasida bir muddat o'ynagan. Ammo, agar hujumchi xuddi shu ruhda davom etsa, o'z vatanini himoya qiladigan asosiy tarkibga kirishi haqiqatga aylanadi. Norvegiya va Shotlandiya bilan kechadigan Evro-2024 saralash bosqichiga ikki oy qoldi va terma jamoadagi pozitsiyada asosiy raqib hisoblangan Alvaro Morata Xoseluga (11) qaraganda kamroq (barcha musobaqalarda sakkizta gol) urgan. Hujumchi faoliyatining asosiy bosqichi tugadi, lekin futbolda muvaffaqiyat sari qadam tashlashga hech qachon kech emas. Buni Arits Aduris misolidan ham bilib olish mumkin.