Yuklab olishStadion.uz ayni damda dunyoning eng kuchli murabbiylaridan tashkil topgan kuchli o'nlikni e'tiboringizga havol etadi.
10-o'rin. Tomas Tuxel (PSJ; Germaniya) va Mauritsio Sarri («Yuventus»; Italiya)
Bugungi ro'yxatimizni o'z chempionatlarida gegemonlik qilayotgan murabbiylar ochib beradi. Ular o'z uslubiga ega bo'lishsa-da, xalqaro musobaqada g'olib chiqmagunga qadar yangi darajada ko'tarila olishmaydi. Hatto Sarri hali “Skudetto”ni ham qo'lga kiritgani yo'q. Bu murabbiylarning ichki birinchilikda g'olib chiqishlari muxlislar tomonidan oddiy qabul qilinadi. Bugungi ro'yxatdagi hamkasblaridan o'zib ketishlari uchun hech bo'lmaganda Chempionlar ligasida zafar quchish talab etiladi. Ular boshqarayotgan klublardagi futbolchilar darajasi Evropada tengsiz bo'lishni ta'minlashga qodir. Barchasi ularning o'z qo'llarida.
9-o'rin. Jan Pero Gasperini («Atalanta»; Italiya)
Yuqorida nomi zikr qilingan murabbiylardan farqli o'laroq, Gasperinida yulduz futbolchilar yo'q. Boz ustiga, u boshqarayotgan klub ham so'nggi yillarda A Seriyada aytarli hech narsani qoyillatmagan edi. Aynan Gasperini bergamoliklarni oyoqqa turg'azadi. Qo'l ostidagi o'rtamiyonayigitlarni Evropadagi eng sermahsul futbolchilarga aylantirdi. Jamoa tarixida ilk bor EChLda ishtirok etdi va debyut mavsumidayoq pley-offga chiqdi va “Valensiya”ni dog'da qoldirdi. Bundan tashqari, jamoaning A Seriyadagi ishlari ham chakki emas. Umuman olganda,Gasperini oddiy masalliqdan ham shedevr taom tayyorlashda davom etmoqda.
8-o'rin. Yulian Nagelsmann («RB Leyptsig»; Germaniya)
Bu yosh iqtidorli mutaxassisda bir necha yildan so'ng, ro'yxatning birinchio'rnini egallash uchun imkoniyatlari juda va juda yaxshi. Ronaldudan 3 yosh kichik murabbiyning erishayotgan yutuqlari tahsinga sazovor. U o'zining ikkinchi jamoasi bilan EChLda ishtirok etmoqda. Avvaliga “Xoffenxaym” bilan EChLda shov-shuv ko'targancha guruhda qolib ketgan bo'lsa, endilikda “RB Leyptsig” 1/8 finalda Jozening “Tottenhem”ni musobaqadan chiqarib yubordi. Nagelsmannda o'sish kuzatilayotganiga bundan ortiq isbot bo'lmasa kerak.
7-o'rin. Antonio Konte («Inter»; Italiya)
Konte dunyo futbolida o'z nomi va o'yin manerasiga ega murabbiylar qatoriga kiradi. Shunga qaramay, u bir erda uzoq ishlay olmaydi. Misol uchun “Yuventus”da chempionlik seriyalarini qayd etdi va “Chelsi”ga yo'l oldi. Keyin APL chempionligi va Angliya kubogida zafar quchgach, yana ortda Italiyaga qatdi. U boshchiligidagi “Inter” o'zini tiklab oldi va chinakamiga skudetto uchun kurash boshladi. Umuman olganda, Konte zamonamizning eng kuchli mutaxassislaridan biri, biroq dunyoning eng kuchli murabbiy bo'lish uchun buning o'zi kamlik qiladi.
6-o'rin. Maurisio Pochettino (jamoasiz; Argentina)
Kuzda argentinalik murabbiy ishsiz qoldi, biroq o'zidan yaratuvchi murabbiy nomini qoldirdi. To'g'ri, uni birorta sovrin yutmagan deyishingiz mumkin, biroq u qo'l ostida o'ynagan futbolchilardagi o'sishga e'tibor qarating! Maurisio chinakam kreativ murabbiy. U sekin-astalik bilan Angliyadagi eng beqaror jamoani stabil ko'rinishga olib keldi va hatto EChL finalida o'ynadi. Afsuski, navbatdagi sovrinsiz o'tgan mavsum uning ruhiy xolatiga kuchli ta'sir o'tkazdi. Shunga qaramay, barchasini o'nglash uchun unda etarlicha imkoniyat mavjud.
5-o'rin. Diego Simeone («Atletiko»; Argentina)
Dunyodagi eng katta maosh oluvchi murabbiy eng sovrindor murabbiylar qatorida emas.Shunga qaramay, aynan Simeone "matraschilar”ni yangi darajaga ko'tarilishiga sababchibo'ldi. Uning qo'l ostida o'rtamiyona klub Ispaniyadagi uchinchi kuchga aylana oldi. EChL finallari, Ispaniya chempionligi Diegoni hurmat qilish kerakligidan dalolat. Simeone Madrid klubi har jabhada oldinga tortmoqda. Endilikda, "Atletiko” 126 million evroga futbolchi sotib olishga qodir jamoaga aylandi. To'g'ri, Simeonening “avtobus” uslubi ko'pchilikka yoqmaydi, biroq “Liverpul”ni EChLdan chiqarib yuborgan klub murabbiyi bilan hisoblashmaslikning iloji yo'q.
4-o'rin.Massimiliano Allegri (jamoasiz; Italiya)
Allegri ayni damda madaniy hordiq olmoqda. “Yuventus”dagi 5 yillik faoliyati davomida 5 ta chempionlik va 4 ta kubokda zafar quchgan murabbiy ikki bor EChL bosh sovriniga juda yaqin kelsa-da maqsadiga erisha olmadi. Italiyada Turin superklubining mutlaq hokimligini o'rnatib ketgan murabbiy bugungi kunda dunyo futboliga chetdan nazar tashlamoqda. Obdan mushohada qilib olgan murabbiy katta futbolga yanada kuchli bo'lib qaytishga juda yaqin turibdi.
3-o'rin.Zayniddin Zidan («Real»; Frantsiya)
Juda kamdan-kam hollarda afsonaviy futbolchilardan yaxshi murabbiy chiqadi. U “Real Madrid” bilan Allegri uddalay olmagan ishni ketma-ket 3 bor uddasidan chiqdi. Keyin Peres bilan mojoro sababli klubdan ketdi. Biroz fursatdan so'ng, yana qaytdi va barchasini noldan boshladi. Hozircha, u barchasini o'z o'rniga qaytarishga harakat qilmqoda, lekin bu ish uchun unga ijrochilar tanqisligi to'sqinlik qilyapti. Umuman olganda, Zizu tez orada yangi kuchlar bilan dunyo futbolini qayta zabt etish uchun kurashga qo'shilishi aniq.
2-o'rin. Xosep Gvardiola («Manchester Siti»; Ispaniya)
Gvardiolaning “Barselona” bilan ko'rsatgan natijasi ko'pincha Messining super o'yini soyasida qolib ketar edi. Endilikda, Pep “Manchester Siti” bilan barchaga aslida engilmas “Barselona”ning kuchi nimada ekanligini ko'rsatib qo'ydi. Angliyada mavsum davomida barcha musobaqalarda g'olib chiqqan va birinchi bo'lib 100 ochko jamg'argan murabbiy bugungi ro'yxatda birinchio'rinda bo'lishga haqli, biroq buning uchun u EChLni “Barselona”siz ham yutishga qodirligi barchaga isbotlab qo'yishi kerak.
1-o'rin. Yurgen Klopp («Liverpul»; Germaniya)
Klopp “Liverpul”ni qabul qilib olganida, klub omadsiz transferlardan tashkil topgan jamoa edi desak, “qizillar” muxlislari xafa bo'lishmasin. Klopp muammoni sekin, biroq izsiz yo'qotdi. Avvaliga Evropa finalida o'ynagan jamoa keyin EChL finaliga etib bordi. Kelasi yili esa, uzoq kutilgan chempionlik. APLda 97 ochko chempionlikka kamlik qilgan edi, bu mavsumda raqiblarini etib bo'lmas darajada ortda qoldirishdi. Umid qilamizki, APL mavsumni to'liq yakunlash yo'lini topadi. Ana shunda, Klopp “Liverpul” muxlislarining 30 yillik orzusini amalga oshirgancha klub tarixida abadiy qoladi.
Online
Bosh sahifaga