La liga. «Real» mahorat evaziga g'alaba qozondi

Odatda "Real" uchun qishki ta'tildan keyingi birinchi o'yin qiyin bo'lib kelgan.

Yuklab olish

Odatda "Real" uchun qishki ta'tildan keyingi birinchi o'yin qiyin bo'lib kelgan. Jamoa so'nggi beshta mavsumning 4tasida yangi yilni g'alaba bilan boshlay olmagan. Zidan jamoasi bugun bo'lib o'tgan «Xetafe»ga qarshi o'yinda yorqin o'yin namoyish qila olmadi. Shunga qaramay, "Qirollik klubi" 3 ochkoni qo'lga kiritdi.

Tibo Kurtua birinchi bo'limda 3 marta ajoyib seyv namoyish qilib, o'z jamoasini muqarrar gollardan qutqardi. "Madrid" joniga esa "standart"lar ora kirdi. 34-daqiqada Mendi qanotdan etkazilgan uzatmaga Varan sakradi, darvozabon esa muvafaqiyatli chiqa olmadi. Natijada to'p "Real" himoyasining boshi va posbonning qo'llari aralash to'rga borib tushdi. Gol David Soriya avtogol sifatida yozildi.

Ikkinchi bo'limda esa Varan baribir gol urdi. Kroos tomonidan etkazilgan uzatmani himoyachi bosh bilan mezbonlar darvozasiga joylab qo'ydi. Videoyordamchi hakam ushbu vaziyatni uzoq tahlil qilib, yakunda golni inobatga oldi.

Mazkur gol amalda o'yin taqdirini hal qilib qo'ydi. Madridliklar qolgan daqiqalarda ishonchli himoyalanishdi. Boz ustiga, o'yin qo'shib berilgan 6 daqiqaning so'nggisida mehmonlar qarshi hujumga chiqib ketishdi va Valverdening uzatmasidan keyin Modrich bo'sh darvozani ishg'ol qildi.

Shu tariqa, "Real" 2020 yilni g'alaba bilan boshlab, o'z ochkolarini 40taga etkazib oldi.

Ispaniya La ligasi, 19-tur
Xetafe – Real Madrid 0:3 (0:1)
Gollar: 0:1 – 34, avtogol Soriya, 0:2 – 53 Varan, 0:3 – 90+6 Modrich.
Xetafe – Soriya, Kukurelya, Djene, Kabrera, Nom (Ndiaye, 81), Arambarri, Maksimovich, Fajr (Molina, 60), Suares, Anxel Rodriges, Mata (Portilo, 80).
Real Madrid – Kurtua, Militao, Mendi, Karvaxal, Varan, Kazemiro, Kroos (Valverde, 71), Isko (Vinisius Junior, 71), Modrich, Beyl, Benzema (Yovich, 81).
Ogohlantirishlar: Nom (34), Suares (39), Yovich (82), Portilo (90), Mendi (90).