La liga. «Real» «Barsa»ga yaqinlashish imkoniyatidan foydalana olmadi

Madridning "Real" klubi ushbu turda "Barselona"ning ochko yo'qotishidan foydalana olmadi.

Madridning "Real" klubi ushbu turda "Barselona"ning ochko yo'qotishidan foydalana olmadi. Zidan shogirdlari Bilbaoda "Atletik"ni mag'lub eta olishmadi.

"San-Mames" stadionidagi o'yin juda shiddatli kechdi. Uchrashuvda hisob ochilmagan bo'lsa-da, o'yin muxlislarni aslo zeriktirib qo'ymadi.

Bahs debyutida Benzema jarima maydonchasi ichida yo'llagan zarba natijasida to'p ustunga tegdi. Bugungi o'yinda darvozabonlarga anchagina ish topildi. Jumladan, Navas ber necha marta seyv namoyish qilishiga to'g'ri kelgan bo'lsa, Arrisabalaga ham darvoza daxlsizligini saqlab uchun ancha ter to'kdi.

Mezbonlar dastlabki bir soat davomida nomdor raqib bilan tengma-teng kurash olib borishdi. Ular bu vaqt davomida hujumga hujum bilan javob berishdi. Biroq so'nggi yarim soat ichida to'la ustunlik "Madrid" tomonida bo'ldi. Bilbaolik futbolchilar matonat bilan himoyalanishlariga to'g'ri keldi.

Uchrashuv tugashiga 5 daqiqa qolganida "Real" sardori Serxio Ramos ikkinchi sariq kartochkani olib, maydonni tark etdi. Ushbu chetlatish madridliklarning shashtini ancha pasaytirib qo'ydi. Boz ustiga, hakam ikkinchi bo'lim boshida Ramosning qo'polligi tufayli "Real" darvozasiga penalti belgilamagandi.

Shu tariqa, muhim 1 ochkoni qo'lga kiritgan "Atletik" 14 ochko bilan bor-yo'g'i 15-o'ringa ko'tarilib oldi. "Qirollik klubi" 28 ochko bilan 4 va 5-o'rinlarni "Sevilya" bilan bo'lishib turibdi. Jamoa peshqadam "Barselona"dan hamon 8 ochko ortda qolmoqda. Zidan jamoasini keyingi turda jadvalda 3-o'rinda borayotgan "Sevilya"ga qarshi bahs kutib turibdi.

Ispaniya La ligasi, 14-tur
Atletik – Real Madrid 0:0 (0:0)
Atletik – Arrisabalaga, Echeyta, Balensiaga, De Markos (Inigo Lekue, 72), Nunes, Raul Garsiya, Mikel Riko, Susaeta, Iturraspe (San Xose, 39), Inyaki Uilyams (Kordoba, 83), Aduris.
Real Madrid – Navas, Varan, Marselo, Karvaxal, Ramos, Modrich, Kazemiro, Isko (Kovachich, 82), Kroos, Ronaldu, Benzema (Mayoral, 82).
Ogohlantirishlar: Ramos (11), De Markos (45), Echeyta (57), Kazemiro (73), Karvaxal (90), Ronaldu (90).
Chetlatish: Serxio Ramos (86).