Afsuski, yangi mavsumda ularni endi maydonda ko'rmaymiz

Yuklab olish

Stadion.uz futbolchilik faoliyatini 2020 yilda yakunlagan afsonalar bilan tanishtirib o'tadi.

Iker Kasilyas

Aslida, o'tgan mavsumdayoq Ikerning yashil maydonga qaytmasligi aniq bo'lib ulgurgan edi. Bu mavsumda u rasman qo'lqoplarini mixga ilib yubordi. O'z faoliyati davomida 30dan ortiq sovrinlarni boshi uzra ko'targan kiper 21 asrning eng yaxshi darvozabonlaridan biri sifatida tarixdan o'rin egalladi.

Stefan Lixtshtayner

Shvetsariya terma jamoasi sardori “Augsburg” bilan o'rtadagi shartnoma yakunlangach, biroz muddat klubsiz qolib ketdi. Oqibatda, butsalarini mixga ilib yuborishga qaror qildi. Terma jamoa safida 100 dan ortiq o'yin o'tkazgan himoyachi “Yuventus” bilan 14 ta sovrinni boshi uzra ko'tarishga muvaffaq bo'ldi.

Benedik Xyovedes

Germaniya terma jamoasi bilan JChda g'olib chiqqan himoyachi Moskvaning “Lokomotiv” klubi safida ishonchli o'yin ko'rsatayotgan edi, biroq 32 yoshida futbol bilan xayrlashdi. O'zining qarorini ushbu sport unga avvalgidek qadrdon emasligi bilan izohlagan himoyachi, endilikda murabbiylik kurslariga hujjat topshirish haqida bosh qotirmoqda.

Jeremi Matyo

Afsuski, Jeremi futbolchilik faoliyatini jarohat sababli yakunladi. Bu futbolchi uchun eng yomon yakun. “Valensiya”dagi fantastik o'yinlari sababli uni “Barselona” 30 million evro evaziga sotib oladi. 30 yoshdan keyin sotib olingan eng qimmat himoyachiga aylangan frantsuz negadir Kataloniya klubida o'zini ko'rsata olmadi. Shunga qaramay, “Barselona” safida 9 ta sovrinni o'ziniki qilib oldi.

Leyton Beyns

Leyton anchadan beri “Everton”ning asosiy futbolchisi. Shu sababli, uning futboldagi ilk klubi “Uigan” bo'lganidan ko'pchilikning xabari yo'q. Penaltilar ustasi sanalgan himoyachini yangi mavsumda “Everton” tarkibida ko'rmaymiz. U kamtarin futbolchi edi. Futboldan ketishi ham katta shov-shuv ko'tarmadi.

Vensan Kompani

Ushbu tarkibimizdagi yana bir fantastik futbolchi. “Manchester Siti”ning uzoq muddat almashtirib bo'lmas futbolchisi maqomida to'p tepgan himoyachi bu mavsumni “Anderlext”da o'tkazdi. Deyarli o'ynovchi murabbiyga aylangan himoyachi kelasi mavsumdan boshlab klubning murabbiylar shtabida ko'rinish bersa, ajab emas.

Emre Belezoglu

Turk futbolchisi deyarli 20 yil davom etgan faoliyati davomida “Galatasaroy”, “Inter”, “Atletik”, “Nyukasl”, “Fenerbaxche” va “Istanbul” singari jamoalari sharafini munosib himoya qildi.

Faoliyati davomida 19 ta sovrinni boshi uzra ko'targan futbolchi bu mavsumda barchasiga nuqta qo'yishga qaror qildi.

Andre Shyurrle

2014-yilda Germaniya safida JCh g'olibligini qo'lga kiritgan Andre ham nisbatan erta futbol bilan xayrlashdi. 29 yoshida sportdan zerikib qolgan nemisni jarohatlar boshi berk ko'chaga olib kirib qo'ygani bor gap.

O'z faoliyati davomida atigi 5 ta sovrinni boshi uzra ko'targan bo'lsada, uning moliyaviy ahvoliga havas qilish mumkin.

Klaudio Pissaro

Bundesliganing chinakam farzandi – Pissaro 41 yoshida futbol bilan xayrlashdi. Bir yo'la “Bavariya” va “Verder” klublari faxriga aylangan hujumchi sovrinlarining deyarli hammasini Myunxen jamoasi bilan qo'lga kiritdi.

“Bavariya” safida 224 ta o'yin o'tkazgan hujumchi 86 bor raqib darvozalarini ishg'ol qilishga muvaffaq bo'ldi. Uning sovrinlari orasida Evropa chempionlar ligasiing oltin medallari ham bor.

Arits Aduris

“Zorro” laqabi bilan “Atletik Bilbao” klubi muxlislari yuragidan o'rin egallagan hujumchini ham kelasi mavsum yashil maydonda ko'rmaymiz. 39 yoshida ham chakki mavsum o'tkazmagan forvard “Barselona” bilan o'yinda butsalarini mixga ilishni reja qilgan edi, ammo jarohat bunga imkon qoldirmadi. Natijada, Aduris ancha ertaroq hammasi yakunlanganini rasman e'lon qildi.

Mario Gomes

2018/19-yilgi mavsumda “Shtutgart” bilan Bundesligadan pastga ravona bo'lgan Gomes jamoa muxlislariga kelasi mavsumda yana Bundesligaga qaytishga va'da bergan edi. E'tiborlisi shundaki, 2019/20-yilgi mavsumda hujumchi o'z va'dasining ustidan chiqdi. Ayniqsa, uning hal qiluvchi uchrashuvlarda kiritgan 7 ta goli “Shtutgart”ga elita chiptalarini taqdim etdi. Jamoa yangi mavsumni Bundesligada boshlashiga qaramay, Gomes futboldan ketishga qaror qildi.