UzReport TV Klublar o'rtasidagi jahon chempionatini namoyish qiladi

"UzReport TV" telekanali Klublar o'rtasidagi Jahon chempionati translyatsiya huquqini xarid qildi.

Xabaringiz bor, shu yilning 6-16 dekabr kunlari Birlashgan Arab Amirliklarda Klublar o'rtasida Jahon Chempionati bo'lib o'tadi.

Mazkur musobaqada o'z qit'alarida klublar o'rtasidagi musobaqalarda g'alaba qozongan "Real Madrid" (Ispaniya), "Gremio" (Braziliya), "Pachuka" (Meksika), "Vidad Kasablanka" (Marokash), "Urava Reds" (Yaponiya), "Oklend Siti" (Yangi Zelandiya) kabi jamoalar va mezbon "Al-Jazira" (BAA) jamoasi qatnashadi.

O'zbekistonlik FIFA referisi Ravshan Ermatov ushbu musobaqada o'z brigadasi bilan ishtirok etishini ham ta'kidlab o'tish zarur. O'zbekistondagi millionlab futbol muxlislari mazkur musobaqadan o'rin olgan uchrashuvlarni katta qiziqish bilan tomosha qilishini inobatga olgan holda, "UzReport TV" telekanali Klublar o'rtasidagi Jahon chempionati translyatsiya huquqini xarid qildi. 

6-16 dekabr kunlari Klublar o'rtasidagi Jahon chempionatidan o'rin olgan qiziqarli uchrashuvlarni UzReport TV telekanalida kuzatib boring! UzReport TV telekanalida syurprizlar mavsumi davom etadi!

Eslatib o'tamiz, UzReport TV 7-dekabr kuni "Oltin to'p" topshirish marosimini ham to'g'ridan-to'g'ri efirga uzatadi.